Podcasts

FPK Recitals: Kabhi Kabhi by Sahir Ludhianvi

Posted on

Recited by Mir Basit Hussain

kabhī kabhī mire dil meñ ḳhayāl aatā hai

ki zindagī tirī zulfoñ kī narm chhāñv meñ

guzarne paatī to shādāb ho bhī saktī thī

ye tīrgī jo mirī ziist kā muqaddar hai

tirī nazar kī shuāoñ meñ kho bhī saktī thī

ajab na thā ki maiñ begāna-e-alam ho kar

tire jamāl kī ra.anā.iyoñ meñ kho rahtā

tirā gudāz-badan terī nīm-bāz āñkheñ

inhī hasīn fasānoñ meñ mahv ho rahtā

pukārtīñ mujhe jab talḳhiyāñ zamāne kī

tire laboñ se halāvat ke ghūñT pī letā

hayāt chīḳhtī phirtī barhana sar aur maiñ

ghanerī zulfoñ ke saa.e meñ chhup ke jī letā

magar ye ho na sakā aur ab ye aalam hai

ki tū nahīñ tirā ġham terī justujū bhī nahīñ

guzar rahī hai kuchh is tarah zindagī jaise

use kisī ke sahāre kī aarzū bhī nahīñ

zamāne bhar ke dukhoñ ko lagā chukā huuñ gale

guzar rahā huuñ kuchh an-jānī rahguzāroñ se

muhīb saa.e mirī samt baḌhte aate haiñ

hayāt o maut ke pur-haul ḳhārzāroñ se

na koī jāda-e-manzil na raushnī kā surāġh

bhaTak rahī hai ḳhalāoñ meñ zindagī merī

inhī ḳhalāoñ meñ rah jā.ūñgā kabhī kho kar

maiñ jāntā huuñ mirī ham-nafas magar yūñhī

kabhī kabhī mire dil meñ ḳhayāl aatā hai

Click to comment

Most Popular

© 2024 Free Press Kashmir. All rights reserved.

Exit mobile version